《魚缸博客》

迷信缸友今日（２４日）見到「黑仔三寶」，即係大象（００００５）、祖國移動（００９４１）同埋生發發（００３８８），今朝早段齊齊喺７３蚊邊位，即時個心打咗一個冷震。７３唔係不吉利嘅數字，不過７３年喺股場嚟講就係大件事。　　老一輩缸友對於７３年股災仍然歷歷在目，話說當時恆指由７２年３００幾點，去到７３年高位竟然見到１７００幾點，全民陷入炒股狀態。當時殖民政府「攪笑」到出動消防員禁止缸友入華人行買股票，即係「消防員到交易所救火」、又出現「魚翅撈飯」、「鮑魚煲粥」、「老鼠斑魚蛋」、「５００蚊鈔票點煙」等瘋狂現象。最後係點當然唔使博客多講。　　今時今日股場由３萬幾點碌到現水平，雖然跌幅無當年咁大，亦唔會有消防員去生發發，不過缸友都係要小心未來經濟情況對股場嘅影響，做足功課減少損失。