《小傳日記》

香江噚日（１３日）大插插，收市穿埋上個月低位，重貨缸友都人心惶惶。不
過花旗市噚晚先跌後升，而之前「擔心」嘅，忽然又掉轉頭用嚟唱好；高佬今晚公布第二季業績
，今回又「斷估」會創出好成績，再加埋天后級分析員睇好金融股，花旗市嘭嘭聲抽上逾２％。
花旗市誇啦啦。香江今日即刻收復失地，高開３００幾點之後上午都只係上上落落，但係午飯之
後跟住阿爺步伐急急向前，以接近全日最高位收市，報１７８８５升６３１點，國貨場彈３７２
點，報１０６５１。
　　噚日仲刮緊颶風，今日大市已經陽光普照，問你服未？！不過，大升市無成交配合，主板交
５１０億銀，仲低過噚日大跌市。

　　　　　　　　　　＊同一個借口好淡兩面睇，高佬今放榜缸友昅到實＊

　　個市成交一路縮，最閉翳可能係港交所（００３８８）有祖國傳媒報道，一河之隔嘅深交所
打算同港交所充份合作，合作嘅建議有多方面，包括香江ＥＴＦ喺深圳掛牌、深交所買賣香江股
票嘅ＣＤＲ，另外亦可以允許深交所Ｂ股同香江Ｈ股互相掛牌。呢啲建議都係革命性，點樣落實
同幾時落實都未知，港交所今日反應唔係好大，只係踢高２﹒５巴仙，落後畀好多大隻佬。
　　叨花旗國嘅光，香江嘅金融份子今日好好景。一直唱啖金融份子嘅天后級分析員
Ｗｈｉｔｎｅｙ轉口風，唱好高盛，搞到噚晚花旗股場大升，連帶大象（００００５）、宏利（
００９４５）都受惠，前者彈４﹒４巴仙，後者更加升５巴仙。另外渣打（０２８８８）亦都有
４﹒８巴仙進帳。
　　
　　　　　　　　　　＊大象不再笨地主復生氣，祖國場勢勁ＥＴＦ有景＊

　　地主股噚日領跌，今日反彈亦爭住做一哥。彤叔（０００１７）急彈６﹒４巴仙，恆隆地產
（００１０１）升７﹒２巴仙；大好友（０００８３）都有５﹒１巴仙進帳。另外郭氏兄弟
（０００１６）同將軍澳大型新盤如箭在弦嘅超人（００００１），齊齊升４﹒５同３﹒５巴仙
。
　　祖國保險股都有唔錯勢頭。平保（０２３１８）公布，上半年保費收入按年升３６巴仙，瑞
信出報告撐場，保持優於大市評級，睇７１蚊，散場升５﹒２巴仙。另一隻財險（０２３２８）
亦公布上半年保費收入有１３﹒５巴仙增長，雖然瑞信厚「平」薄「財」，只係畀中性評級，但
都有３﹒２巴仙落袋。大阿哥國壽（０２６２８）只係升３巴仙，而六行就升２﹒６至５巴仙。
　　祖國魚缸升勢凌厲，滬綜指埋單升２﹒１巴仙，創咗１３個月新高，Ａ５０（０２８２３）
成交亦都大增，埋單股價升４﹒１巴仙，標智上證（０３０２４）升幅亦一樣。國貨方面，沉寂
一輪嘅船仔股終於都乘風破浪，中國遠洋（０１９１９）大升８﹒３巴仙，中海發展
（０１１３８）同中海集運（０２８６６）分別升６﹒３巴仙同５﹒６巴仙。

　　　　　　　　　　＊大摩捧油王眾股嘭嘭升，青啤成績靚粉絲即飲勝＊

　　近排油價喺高位回落唔少，不過大摩就唱好油價，話出年平均油價每桶８５美金。石油份子
即刻關車，中海油（００８８３）彈番上９蚊關口，全日升６﹒４巴仙，中石油（００８５７）
升４﹒２巴仙，連帶中石油「囝囝」中油香江（００１３５）都創咗歷史之高，埋單升５﹒２巴
仙。油價上升對中石化（００３８６）唔係好事，只係跟住個市升２﹒７巴仙。
　　唔少股份上半年都係發盈警，但係青島啤（００１６８）就創出佳績，話上半年淨利同比有
六至七成嘅增長。缸友追貨都追唔切，全日急彈６﹒７巴仙。啤酒股可以有咁大增長，證明祖國
消費市道無畀海嘯影響，正如車仔股一樣，成為全球銷量最大國家，連日產同本日都計劃提高喺
內地嘅產能。比亞迪（０１２１１）調整一輪之後，今日再度發力，大漲１３巴仙再創上市後新
高。其他車仔股都有好表現，駿威（００２０３）升７﹒２巴仙，吉利（００１７５）同東風（
００４８９）齊齊升超過２巴仙。

　　　　　　　　　　＊車仔踩行油比亞迪奪冠，礦鐵掀風雨鞍鋼見蠢動＊

　　祖國礦鐵業近排因為「無間道」搞到祖國同袋鼠國滿城風雨，事件仲未平息。有消息話，阿
爺而家重新審核，礦鐵石進口許可證，可能會有２０間企業嘅資格被取消。之前已經經常有消息
話阿爺想整頓礦鐵業，相信今次傳聞係第一步，對於大國貨係好消息，鞍鋼（００３４７）升
４﹒７巴仙，馬鋼（００３２３）揚１﹒３巴仙。
　　八吓其他料，微軟（００４３３８）做咗軟件界大哥之後，推出嘅產品成日畀用家鬧，最終
畀谷歌（Ｇｏｏｇｌｅ）上位。「有競爭才有進步」，真係至理名言；受到挑戰之下，微軟打算
下年推出網上版辦公室軟件，日後屋企用家唔使再畀高昂嘅費用就可以使用，確實係用家之福。
請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式之
　　　　　　　申述或訂立任何建議及推薦，讀者務請運用個人獨立思考能力自行作出投資決定
　　　　　　　，如因相關建議招致損失，概與《經濟通》、編者及作者無涉。