《魚缸博客》

《魚缸博客》金融海嘯發生之後，生發發（００３８８）成為咗大行嘅積極降目標同唱淡嘅對象，花旗剛剛亦出報告，將生發發目標價由１２５蚊大幅下降到６４蚊，不過由於現價過殘，花旗仍然維持番佢「買入」評級。　　點解叫買入？花旗就話生發發依家嘅市盈率（ＰＥ）已經去到沙氏爆發時嘅水平，早排跌穿５０蚊係「孖屐」過份悲觀，佢仲話香江金融市場係全球睇好祖國「孖屐」最方便嘅跳板，生發發必然受惠。佢同「大魔頭」睇法都幾兩極，缸友就認為，中短線講緊一兩年投資期，生發發真係無乜景，但長線投資價值依家已經顯現，不妨分注吸納。 　　《魚缸博客》１蚊美金可以做乜？夠喺香江買一個漢堡包，亦都足夠請起一名跨國公司行政總裁。原來ＡＩＧ畀華府接管咗之後，公司高層唔可以再大花筒，好多人薪酬都受到限制，而新上任嘅行政總裁Ｌｉｄｄｙ為咗向外界顯示對公司前景充滿信心，去到０９年人工都只係得１蚊美金，雖然係有股票收，但股票值唔值錢就係後話。　　收１蚊美金人工唔慘，最慘係袋咗入袋嘅薪金要「嘔」番出來。瑞銀幾名前高層要將２７５０萬美金（約２﹒１億港銀）人工退番畀公司，不過呢幾名賓架就話退番錢唔代表要承認任何其他法律責任。　　由兩單事件去睇，可以預期金融機構高層「打工皇帝」時代已經結束。
《魚缸博客》北京公安終於都證實，國美（００４９３）老闆「首富」黃光裕的而且確係被調查之中，不過就無再透露所為何事。之前事件愈傳愈烈，又話「首富」操控兄長公司股價，又話佢喺公司上市時涉嫌行賄，總之就傳言四起。　　不過缸友最擔心就係呢間民企龍頭代表嘅經營情況。老闆畀當局查，最驚嘅一定係一班供貨商同債權錢莊。做零售呢行，最緊要係貨如輪轉，保持住生意好，資金就不成問題，但如果個個供貨商唔畀貨，另一方面又催繳貨款，咁幾大嘅零售企業都好大問題，希望呢種事件唔會真係發生。
　《魚缸博客》任總大刀闊斧咁注資，令到錢莊嘅水閘開始鬆動，近排幾乎停頓嘅磚頭按揭市場又再蠢蠢欲動。好似寶哥哥（０００２３）咁就拍住郭氏兄弟（０００１６）齊齊上，為佢地元朗嘅細價新盤造九成半按揭，擺明係專攻上車客。　　缸友認為，寶哥哥今次咁爽手，好有可能係因為個盤開價相對保守，對於錢莊嚟講風險比較低，亦都顯示只要磚頭價回到合理水平，錢莊水喉係會為客戶而開，估計二手磚頭價至現水平會繼續橫行一段長時間，之後係上定係落，就要睇明年失業率升到邊個程度。
　《魚缸博客》華府之前嘅救市措施成日畀人話就住就住，最終７０００億美金嘅一半話咁快用晒，但係望番「孖屐」又見唔到起色，終於噚日（２５日）聯儲局就出手，今次嘅金額去到８０００億美金，主要都係令錢莊資金充裕，等個磚頭市道可以轉活。　　依家大家面對嘅都係信心問題，一日美國缸友對前景無信心，又要擔心被裁又要擔心錢莊收樓，消費信心好極有限。唔搞掂個信心，個深淵都係無底洞。
　　《魚缸博客》今日（２５日）下晝東航（００６７０）係升得最離奇嘅股份。點解咁講？今朝先剛剛有傳聞話佢因為對沖炒期油蝕咗５０幾億銀，呢種格局唔跌都偷笑，真係無理由有得升，最高仲升近兩成咁誇張。　　缸友就話，蝕得甘亦未必係壞事，因為爛數太多最終可能迫到阿爺一定出手拯救，話唔定近日就會有定案。
　　《魚缸博客》股神巴菲特近排成日畀人質疑佢嘅投資眼光，仲陷入破產驚魂，旗下巴郡嘅信貸違約掉期價急升。雖然係咁，佢之前買番嚟嘅比亞迪（０１２１１）就繼續有支持，今日（２５日）股價就彈番上１１蚊水平。　　走勢派話，現價已經升近下跌裂口阻力頂部１１﹒４銀，預計會喺呢個水平牛皮，不過若突破呢個區域不妨小注跟入，初步目標１３蚊左右，穿１０﹒７銀止蝕。
　　《魚缸博客》美國政府做咗「黃大仙」，金融機構真係有求必應，不過呢個黃大仙變唔到法術，變出嚟嘅銀紙係有代價，可以預期嘅係，美國甚至全球嘅通脹率好有機會會回升，經濟唔能夠見到增長之餘仲會收縮，踏入長期滯脹。　　缸友話面對咁嘅時勢，黃金作為抗通脹良藥，可能係資金最佳出路，面對艱難前景，缸友有必要兩手準備，將部分資金買金或者可以避過一劫。