《魚缸博客》

　　《魚缸博客》渣打（０２８８８）公布，以接近３供１嘅比例，以每股約４５蚊，即係倫敦收市價折讓約五成，供股籌１８億英鎊。之前渣打唔肯接受米字國政府打救，缸友都話佢財政夠晒穩健，點知短時期內就向股東伸手，真係估佢唔到。　　睇番解釋，公司都係想充足番一級資本，供股其實唔算係壞事，不過咁大折讓供股，相信公司復牌之後點都要跌一跌，０２年上市價８４蚊相信都守唔住。
　《魚缸博客》祖國航空（００７５３）宣布，喺７月油價最高時候，為咗對沖做咗大手燃油期貨合約，依家油價插到咁低，損手３１億人仔。唔止投資損手，原來唔少鐵鳥都欠阿爺服務費，個地步仲嚴重到要阿爺透過中央台出聲，咁多間夾夾埋埋欠成４３億人仔，當中包括有香江上市嘅幾間大鐵鳥。阿爺仲要求鐵鳥還一部分款項，唔係就保留終止服務權利。　　缸友就話，投資損手再加上欠服務費，就算人仔升值一兩成都好難追到條數，依家只係望阿爺出手打救，等鐵鳥可以南飛過冬。
　《魚缸博客》一間雷曼兄弟破產，搞到全球金融市場嘅震盪，仲驚嚇過五六級地震，另一間更加重磅嘅花旗，亦話缺水等緊政府解救，最終政府要再注資２００億美金換取優先股，不過條件都幾苛刻，未來三年普通股唔可以派多過１美仙息，揸住花旗股票嘅缸友真係暈得一陣陣。　　花旗集團除咗「體積」巨大之外，佢更加係百足咁多爪，業務範圍廣泛，有業界人士形容，花旗萬一倒閉肯定會慘烈過雷曼，苦主人數更可能倍升，所以美國政府唔救唔得。有缸友就話，依家時勢情願等到消息再穩定啲時先入市，捱高少少價都無所謂，好過入市慘成箭靶。
　　《魚缸博客》通常公司股價下跌，管理層都會買番公司嘅股票以示支持，唔少本地富豪亦都經常咁做，不過富力（０２７７７）嘅高層就有唔同做法，主席同執董夾埋用咗８０００幾萬人仔，「回購」公司喺北京發展嘅兩個物業，令公司賺咗３０００幾萬。　　呢單都只係八卦料，唔足以撐起公司股價，不過講開祖國地主近排都有好消息，好似北京就有新措施撐磚頭市道，相信依家阿爺都覺得要保住呢個市場，因為資產下滑過急會有一連串問題，缸友不妨入市跑短線圖利，博再有新政出台。
　《魚缸博客》錢莊喺「落雨天」當然係「收遮」，更可況係今次金融「豪雨」；而大部分大企業都靜蠅蠅，唔敢話再買資產。不過，身家一直雄厚嘅大象（００００５）竟然無有怕，傳聞話佢地有意趁依家市況低迷，增加喺拉丁美洲嘅業務，向陷入財困嘅花旗集團敲門，睇下可唔可以「執筍貨」。　　大象咁積極可以從正反兩方面睇，正方面當然係水頭充足，面對今時今日咁嘅環境，唔使米字國政府幫助之餘，仲可以出手買貨；但係從差嘅一方面睇，依家買入嘅資產可令公司風險增大，無端端令自己身陷泥濘咁就大件事。
《魚缸博客》祖國股場今日（２１日）食完晏之後就迅速收復失地，低位倒升速度都幾快。有缸友話係因為亞洲區股市都倒升，無理由留低亞爺一個咁慘，祖國股場跟升唔出奇。不過最大可能都係「周末救市症」又再發作。　　市場傳聞話，阿爺將會大幅減息，仲去到５４點子咁多，目的係透過加大力度穩住成個金融市場，包括希望錢莊放更多水入個市場，唔好令借貸市場癱瘓。呢個「症」萬一真係發作，通常都會有幾日反應，缸友揸緊止蝕止賺位就不妨上車睇短線。
　《魚缸博客》反映乾散貨運費嘅「菠蘿指數」，由年中高位近１２０００點，一路碌到最近低位８００點，幾個月之間蒸發九成幾。不過望番指數嘅走勢，去到８００點左右就暫時止瀉，呢輪都係喺８５０點左右徘徊，無再大插。缸友話，雖然航運需求未來一兩年唔見得會大翻身，但估計現時運費已經好貼近成本價，再大跌空間有限，不妨趁低吸納航運份子，等下一個周期升浪出現，首選係中海發展（０１１３８）同中國遠洋（０１９１９）。
《魚缸博客》「大魔頭」都唔係淨係識唱淡，所謂「食得是福」，大魔頭對於飲食股反而情有獨鍾。佢地今日（２１日）出報告推介小肥羊（００９６８），話公司以特許經營模式做得成功，作為龍頭股喺面對經濟下滑之時有防守力，畀目標價１﹒９銀，評增持，現價入潛在升幅大概係三成半。　　不過缸友話，依家高消費餐飲唔係咁好景，經濟收縮之下，缸友出街食飯都明顯少咗，未來幾年小肥羊亦唔係易捱，入貨真係要有長線投資嘅心理準備。
　《魚缸博客》地主近年鍾意將新磚頭「吊高嚟賣」，好多都係以「唧牙膏」方式放盤，不過時移世易，金融海嘯之下地主們都開始接受現實，好似郭氏兄弟（０００１６）咁，副主席炳江噚日（２０日）見記者時就話，會跟隨市況開盤，仲話會調整吓啲價錢。　　缸友就話，今次郭氏兄弟聲言減價個震撼力都幾大，亦可能對二手磚頭價格增添壓力。缸友估計地主咁高調話減價，好大程度係畀壓力政府，希望佢地個勾地政策門檻唔好定到咁高，等地主可以勾更多地發展，避免日後出現「真空」。
　《魚缸博客》啤酒股不嬲唔係好受經濟影響，業績長期都有保障，特別係青啤（００１６８），最近更加做埋當紅炸子雞，畀「大魔頭」欽點成後旗下門生，下個星期正式入「魔指」。今日（２１日）青啤走勢亦都非常誘人，彈高去到１７蚊以上，不過望番公仔圖，股價去到１８蚊將會係橫行區頂部阻力，要入貨不妨等佢回落，理想入貨位係１５蚊左右。
　　《魚缸博客》生發發（００３８８）畀「大魔頭」唱衰會見３８蚊之後，真係撞正大市主板成交大縮水，之前試過有兩日連４００億銀交投都無，靜到烏蠅飛過都聽到，連帶股價都要縮一縮，今日（２１日）一開市造５０蚊，好快就連半百關都失陷埋，依家距離大魔頭嘅目標終點好近，可以話轉入大直路，缸友亦失晒信心。　　股價雖然唔生性，但係生發發仍然對夥計闊綽，傳聞話佢地準備派發０８年花紅，部分員工可以分到４個月，雖然話會凍薪，但相信員工們喺海嘯下收到呢份「賑災物資」已經好開心。