《魚缸博客》

　　《魚缸博客》噚日（２６日）有春江鴨預先炒起祖國地主股，特別係一啲負債高嘅公司，炒風最熾熱，點知阿爺真係減息，今日（２７日）當然再落多一次鑊，唔怕佢炒過籠。　　不過花旗似乎唔受減息所困擾，繼續對祖國地主作出抨擊。佢地打擊對象係「Ｂｉｇ貴園」（０２００７），目標價得０﹒８４銀，叫人減持。理由係Ｂｉｇ貴園嘅經營模式唔配合時勢，當大家渴望喺理想地區落地生根，佢地就繼續搞郊區大洋房，另外阿爺積極推公營房亦會令佢股價受壓。Ｂｉｇ貴園今日走勢都明顯差過其他地主，有貨缸友不妨借機會減持。
　《魚缸博客》東航（００６７０）同南航（０１０５５）近日相繼停賽，公告話兩間公司都攤大手板問阿爺拎錢，希望改善公司資產負債情況。依家祖國鐵鳥之中，就只有祖國航空（００７５３）繼續落場參賽，個個都湧埋去希望拎啲甜頭，搞到股價彈升一成。　　祖國鐵鳥要問阿爺拎錢大家都已經預期咗，但係按照南航嘅情況，３０億人仔注資根本就幫唔到好多，對公司實際營運根本無改善，呢種借機炒上都幾危險，缸友應該自己衡量下風險。
《魚缸博客》經濟差，舖頭生意唔好，「劈價」；經濟差，國家數據唔靚，「劈息」。阿爺噚日（２６日）終於減息，用「劈息」形容再好不過，因為減幅達１﹒０８厘，係約１０年減幅最勁一次。　　「劈息」當然幫到唔少企業，起碼借咗錢嘅每月負擔都會少啲，個魚塘啲水多番，魚缸好自然會生猛番。不過阿爺咁樣「劈息」，值得深思係背後原因。有缸友話，大幅減息只有一個意義，真係經濟真係差得好緊要，由其係阿爺掌握各樣最新嘅經濟數據，佢明白到唔維持內需保住經濟，祖國亦會唔掂，大刀闊斧減息係暫時唯一途徑。減息對股場短線係好，正如花旗國當日大幅減一樣，但之後﹒﹒﹒
《魚缸博客》「大魔頭」難得出唱好報告，對象係超人旗下嘅和黃（０００１３）。和黃係最早返回沙氏價嘅大隻佬之一，現價低過４０銀，真係抵到大魔頭都流口水。大魔頭仲話，雖然未來業績唔可以抵抗今次金融海嘯而成為「挪亞方舟」，但係佢喺和電（０２３３２）度得到２００幾億股息，自己手頭子彈亦非常充足，要過難關無問題，再加上憧憬「三豬」扭虧，畀目標價４６銀。缸友話潛在升幅雖然唔多，但計番下跌風險，和黃亦真係抵買。
　《魚缸博客》阿爺掟錢搞活番經濟，其中一樣就係增加基建投資。交通部亦都講明，出年會有一萬億人仔畀佢地使，必定要搞好交通基建，直接受惠者必然係中交建（０１８００）。　　三隻基建股之中，講建做路、橋同碼頭，中交建係專家，接獲嘅份額亦係最多，缸友話，萬億投資額中交建必然係分餅分得最多一間，有咁強大後盾，相信中交建好難會試番３﹒５呢啲咁嘅「殘價」，缸友可以逢低吸納，配合佢「頭肩底」形態，首站目標９﹒８銀。
　《魚缸博客》金融海嘯發生之後，生發發（００３８８）成為咗大行嘅積極降目標同唱淡嘅對象，花旗剛剛亦出報告，將生發發目標價由１２５蚊大幅下降到６４蚊，不過由於現價過殘，花旗仍然維持番佢「買入」評級。　　點解叫買入？花旗就話生發發依家嘅市盈率（ＰＥ）已經去到沙氏爆發時嘅水平，早排跌穿５０蚊係「孖屐」過份悲觀，佢仲話香江金融市場係全球睇好祖國「孖屐」最方便嘅跳板，生發發必然受惠。佢同「大魔頭」睇法都幾兩極，缸友就認為，中短線講緊一兩年投資期，生發發真係無乜景，但長線投資價值依家已經顯現，不妨分注吸納。